Nasapwan nga patay na ang pito ka tuig nga bata nga babayi kag ginapatihan nga ginhimuslan sa Purok Arao, Barangay Estefania kagab-i.
Ang biktima nga bata kag ang suspetsado nga ginkilala kay Dexter Villa Juan, 24-anyos ang lunsay mga residente sa amo nga lugar.
Sa impormasyon nga nakuha sang Bombo Radyo Bacolod, nagselebrar sang kaadlawan ang pakaisa sang biktima kung sa diin nagkadto ang biktima kag ang suspetsado nga malapit man nga abyan sang ila pamilya.
Ginapahayag nga nag-inom sang makahulubog nga ilimnon si Villa Juan kag gina-alegar nga nakagamit sang iligal nga druga.
Mga pasado alas-7:00 kagab-i sang nadula ang bata nga babayi subong man ang suspetsado.
Mismo nga si Villa Juan ang nag-ako nga ginlampusan niya sang bato ang ulo sang biktima sang makaduha ka bes tubtob nga malipungan kag gindala sa tago nga lugar kag didto ginhimuslan.
Sa karon, nakahunong sa custodial facility sang Bacolod Police Station 4 si Villa Juan kag natalana nga kasuhan.
