Pito ang kumpirmado nga patay, kalakip ang mismo nga suspek, samtang 15 naman ang pilason sa nagluntad nga pagpangluthang sang estudyante sa isa ka buluthuan sa gwa sang Bangkok, Thailand kahapon, Agosto 7.
Natabo ang insidente sa prestihiyoso nga Debsirin Nonthaburi School sa Bang Kruai district, Nonthaburi province.
Isa ka 14-anyos nga estudyante sang eskwelahan ang suspek.
Gingamit sini ang isa ka 9mm nga armas-luthang nga ginapanag-iyahan sang iya lolo.
Santo sa mga kapulisan, antes nagpadulong sa eskwelahan, gin-utas sini ang kabuhi sang iya mismo lolo kag lola sa ila puluy-an.
Sang nagsulod sa premises sang eskwelahan ang estudyante, nagpalupok ini sang masobra 26 ka bala.
Nagtuga sang kahadlok kag kinagamo samtang nagpanago ang mga estudyante sa sulod sang mga classroom.
Sa kabug-usan, pito ang ginbawian sang kabuhi kalakip ang tatlo ka manunudlo, duha ka estudyante, kag ang lolo kag lola sang suspek.
Matapos ang krimen, gin-utas sang 14-anyos ang kaugalingon nga kabuhi gamit ang armas-luthang.
Sa 15 ka indibidwal nga pilason, pila diri ang nakaangkon sang mga pilas samtang nagkinagamo na sa lugar.
Duha naman ang yara sa kritikal nga kondisyon.
Santo naman sa report sang Department of Foreign Affairs (DFA), wala sang Pilipino nga naulamid sa trahedya.
Padayon pa ang imbestigasyon sang Royal Thai Police tuhoy sa motibo sa likod sang insidente.
