Pilason ang pito ka mga sakay sang van matapos maaksidente sa Purok Talus, Barangay Igmaya-an, Salvador Benedicto, Negros Occidental pasado alas-6:00 kagab-i.
Sa interview sang Bombo Radyo kay Police Major Ellendie Rebusquillo, hepe sang Don Salvador Benedicto Municipal Police Station, nagabyahe halin sa San Carlos City ang isa ka private van padulong kuntani sa Bacolod City.
Sang yara na sa lugar, nadulaan sang kontrol ang driver rason nga aksidente nga nag-overshoot ang van sa pil-as.
Suno kay Rebusquillo, sakay sa van ang 14 ka mga indibidwal kun sa diin pito diri ang naka-agom sang minor injuries.
Gilayon naman nga gindala ang mga biktima sa municipal health unit sa nasambit nga banwa para sa nagakaigo nga pagbulong.
Mensahe ni Rebusquillo sa mga drayber nga maghalong kag maghinay ilabi na kun indi kabisado ang dalan.
