Wala sang nakita nga problema ang isa ka manugbaligya sa Libertad Public Market sa ciudad sang Bacolod sa plano sang Department of Health (DOH) nga buwisan ang mga maasin nga pagkaon lakip na ang uga.
![](https://img.bomboradyo.com/bacolod/2019/11/Plano-nga-buwisan-ang-uga-OK-sa-manugbaligya-sa-Bacolod-2.jpg)
Sa interview sang Bombo Radyo Bacolod kay Norma Batusbatusan, wala sang malain sa tinutuyo sang gobyerno.
Suno diri, wala siya sang nakita nga problema diri bangud ang iya mga suki ang magapangita man sa gihapon sa iya pwesto kun luyag sang mga ini magkaon sang uga bisan anu pa kamahal ang presyo sini.
Kalakip sa mga ginabaligya ni Batusbatusan ang balingon nga mabakal sa tag-400 pesos ang kilo, bulaw nga 300 pesos kada kilo; gusaw sa 250 pesos kada kilo; tabagak nga 160 pesos subong man ang kalkag nga tag-300 pesos ang kada kilo.
![](https://img.bomboradyo.com/bacolod/2019/11/Plano-nga-buwisan-ang-uga-OK-sa-manugbaligya-sa-Bacolod.jpg)
Sa nahibaluan nga ginatun-an sang DOH ang pagpatuman sang buhis sa mga maasin nga pagkaon lakip na ang uga agud nga mapanubo ang pagkonsumo sang asin sang mga pumuluyo kag mapanubo man ang risgo sang pagkaon sang high blood pressure kag kidney disease.