Ginafinalize pa ang plano para sa rehabilitasyon sang Paglaum Sports Complex nga nahalitan sang Bagyo Odette.
Madumduman nga naguba ang atop sang Paglaum Sports Complex nga ginapanag-iyahan sang Negros Occidental provincial government sang naglabay ang Bagyo Odette sang Disyembre tuig 2021 kag ginkaayo lang ini tinalikdan nga tuig para sa MassKara Festival bangud gingamit sang Bacolod City government.
Suno kay Provincial Administrator Atty. Rayfrando Diaz, full repair kag renovation ang himuon sa Paglaum Sports Complex ilabi na ang mga hulot sa 2nd kag 3rd floor nga ginhalinan sang Negros Occidental High School agud nga magamit sang national government agencies nga nagarequest sang office spaces.
Suno kay Diaz, ang final plan ang yara sa Provincial Engineer’s Office.
Samtang ginarepair ang stadium, luyag sang Kapitolyo nga himuon ini nga functional nga sports facility gani ginapangitaan sang paagi nga ini ang mangin rectangular sa grounds agud mabutangan sang mga magamit sa training sang mga estudyante sa NOHS kag iban pa nga eskwelahan.
Nakahanda naman ang Kapitolyo nga iisol ang renovation pagkatapos sang MassKara Festival.
Sa karon, nagapadayon naman ang pagpatahum sang playground sa Capitol Park and Lagoon.
