I-finalize pa sang Department of Education ang pagpatuman sang shifting ukon scheduling sa paggamit sang mga classrooms sa mga eskwelahan nga ginhimo nga evacuation centers sang mga internally-displaced persons sa mga lugar nga apektado sang paglupok sang Bulkan Kanlaon.
Suno kay Ian Arnold Arnaez, Project Development Officer 2 sang Department of Education, Division of Negros Occidental, nagasugod na sa karon ang enrolment sa mga public schools kag sa mga lugar malapit sa Bulkan Kanlaon, ilabi na sa La Castellana, ini ang mangin basehan sa kadamuon sang learning spaces nga ila kinahanglanon sa pagbukas sang klase sa Hunyo 16.
Ang ipatuman sang La Castellana Government ang nakadepende pa sa maestoryahan nga relocation plan para sa mga evacuees kag isa sa option ang pagrelocate sang mga ini sa Panaad.
Suno kay Arnaez, ang Office of the Civil Defense ang nagapadala sang mga tents agud mangin alternative learning spaces apang aminado siya nga indi ini conducive sa pagtuon sang mga estudyante.
Ginpahayag man nga 15 ka adlaw lamang kuntani ang allowed para sa pagpagamit sang eskwelahan bilang evacuation center apang sa sitwasyon sang mga nag-evacuate bangud sa paglupok sang Bulkan indi ini mahimo nga ipilit.
