“100 percent ready” na ang playing venues kasubong man ang pagahiwatan sang opening ceremony sang Palarong Pambansa 2026 ukon 2026 Palaro Tu Agsur.
Ang opening ceremony ang maga-umpisa ala-1:00 bwas sa hapon sa Democrito O. Plaza (DOP) Memorial Sports Complex ukon Patin-ay Sports Complex sa Prosperidad, Agusan del Sur.
Sa interview sang Bombo Radyo Bacolod kay 2026 Palaro Tu Agsur Secretary General Dr Malcolm Garma, subong nga adlaw ang ulihi nga pag-abot sang mga delegates gikan sa nagkalainlain nga rehiyon.
Ginlibot naman nila ang mga playing venues, billeting quarters, kag ang grand stand para sa opening ceremony, agud maseguro nga plastado na ang tanan.
Sa pagsugod sang hinampang, pasalig ni Garma nga sila ang magapatigayon sang flexible game schedules partikular na sa mga tion nga tuman kainit ang tiyempo.
Paathag sini nga ireschedule nila sa hapon ang events kun tuman ka init, partikular na sa mga outdoor sporting events halin alas-10:00 sang aga tubtob alas-3:00 sang hapon.
Apang antes magdesisyon, sila ang magakonsulta man anay sa Pag-asa kag Disaster Risk Reduction and Management Council.
Pahayag ni Garma nga ang isa sa makabig sini nga mapadayaw sang 2026 Palaro Tu Agsur amo ang mga playing venues nga hungod nga ginpatukod para sa subong nga pahampang, nga nakasunod sa international standard.
Mensahe ni Garma sa mga atleta “Go for gold, but have fun.”
Gina-imbetar man sini ang publiko nga maglantaw kag suportahan ang mga atleta.
Ginaseguro nga komportable ang mga atleta sa ila tagsa ka billeting quarters para sa Palarong Pambansa 2026 ukon 2026 Palaro Tu Agsur, kag ini ang airconditioned.
Sa interview sang Bombo Radyo Bacolod kay Pedro Escobarte Jr. CESO IV, public information officer sang Department of Education division of Caraga, sila ang nagakoordinar sa mga na-assign nga incharge sa mga billeting quarters.
Aminado ini nga indi nila maseguro ang 100 percent comfort, apang agud maseguro nga komportable ang mga atleta, sila ang ginhamtang sa mga kwarto nga may aircon.
Apang kun may-ara pagid sang magareklamo sa kainit, sila ang bukas man sa pagpangita sang iban pa nga pamaagi agud makabulig.
Ginatsekyar man nila ang kondisyon sang mga atleta kag iban pa nga delegates agud matumod kun ano pa ang mga kinahanglan nga idugang sa serbisyo.
Sa ila ulihi nga datos kahapon, yara na sa masobra 14,000 ang mga atleta nga naka-abot, samtang masobra 13,000 naman ang mga coaches, trainers, teachers, school staff kag iban pa.
Nagalaom man ini sa mas ginpa-imprubar nga food protocol kaangay sa pagdumili sang pagdala sang karne gikan pa sa iban nga rehiyon, nga mahimo maguba na bangod sa kadugayon sang byahe, agud malikawan ang food poisoning kaangay sa mga nakaligad nga Palaro.
Samtang 60 porsyento sa mga hampang ang patigayunon naman sa isa lang ka venue.
