Liwat na nga patigayunon ang plebisito para sa Joint Venture Agreement sang Central Negros Electric Cooperative kag Prime Electric Holdings Inc. umpisa subong nga weekend Agosto 19 kag 20.
Madumduman nga duha ka adlaw lamang napatigayon ang pebisito sang Hunyo 24 kag 25 kag wala na nasundan sang mga kasunod kuntani nga weekends matapos ang pagfile sang Temporary Restraining Order.
Kasunod sini, nagpatigayon sang pagtinlo sang listahan sang mga member consumer sa Ceneco ang National Electrification Administration (NEA) bangod sa natukiban nga mga discrepancies kaangay sang mga active member consumer apang wala sa listahan, nagtaliwan na apang nagapabilin gihapon sa listahan kag mga member consumer nga nagsaylo na sang puluy-an kag indi na malocate.
Matapos matinluan ang listahan, nadesisyunan na ang pagresume sang piniliay agud matumod kun sugot ukon batok ang mga member consumers sa ginaduso nga JVA nga nagatuyo nga mapa-improve ang paghatag sang serbisyo sang Electric distributor.
Nahibaluan nga halos tanan nga mga alkalde sa franchise area sang Ceneco ang nagapabor kag nagaduso sa JVA kasubong man ang gobernador kag bise gobernador sa Negros Occidental.
Panawagan ni Governor Eugenio Jose “Bong” Lacson sa mga member consumers nga maggwa kag magboto agud mabatian ang ila nga mga sintimyento.
