Ginatun-an pa sang Provincial Legal Office sang Negros Occidental kun pagapasakaan sang kaso administratibo ang lima ka mga empleyado sang Office of the Provincial Agriculturist (OPA) bangud sa paggamit sang resources sang probinsya nga gwa na sa oras sang trabaho.
Madumduman nga ginpapanaugan sang show cause order ang division head kag apat ka mga engineer sang Office of the Provincial Agriculturist matapos nagpadulong sa Victorias City sang Hulyo 15 bangud sa isa ka official transaksyon apang nagpadulong ang mga ini sa ilimnan gamit ang salakyan sang provincial government kag ginpahulat ang driver apisar nga lapaw na sa office hours.
Suno kay Atty. Alberto Nellas, ginsabat sang lima ka mga empleyado sa show cause order nga sila ang gin-imbitahan lamang sang isa ka opisyal sang Victorias City.
Suno kay Nellas, ila pa ginaconsolidate ang mga sabat sang respondents kag pagatsekyaron kun pagapasakaan ang mga ini sang kaso kag kun ano kabug-at ang ila mangin penalidad.
Igaverify pa man sang probinsya sang concern nga local government unit ang impormasyon nagikan sa lima ka mga empleyado.
Suno sa iya, kun gin-imbitihan gid man ang mga ini sang isa ka opisyal, wala ini nagapahanugot sa ila nga pahulton ang driver kag gamiton ang resources sang gobyerno nga lapaw na sa office hours kag sa gin-issue nga travel order.
Kun magtupa sa grave offense, grave misconduct ukon dishonesty ang mangin rekomendasyon, magapagwa ang PLO sang preventive suspension batok sa mga natungdan.
Nagpanugyan man ini sa mga empleyado sang gobyerno nga mangin responsable sa resources kag pondo sang gobyerno.
