Gintingob sang Philippine military kag iban pa nga ahensya sang gobyerno ang ila nga pwersa agud nga makuha ang hustisya kag tapnaon ang impunity kag kriminalidad sa Negros Oriental, matapos ang pagpatay kag Governor Roel Degamo sang Marso 4.
Ginkasugtan ni President Ferdinand “Bongbong” Marcos Jr. sang Task Force Negros, Department of Justice (DOJ), Armed Forces of the Philippines (AFP), Philippine National Police (PNP), kag iban pa nga ahensya nga tingbon ang ila nga pwersa agud nga makuha ang hustisya sa pagpamatay.
Bangod sini duha ka Army brigades kag anti-terrorism unit sang Philippine Army ang gindeploy sa Negros Oriental.
Ginpahayag man ni Police Regional Office 7 spokesperson Police Lieutenant Gerard Ace Pelare nga ang deployment sang military units ang well-assessed security measure nga nagakaigo lamang sa pagresponde sa karun nga sirkumstansya.
Ginpasiguro ni Pelare nga ini ang ginhimo agud nga mapabilin ang kalinong kag seguridad kag agud man masolbar ang mga krimen nga nagkalatabo sang damlag lang sa Negros Oriental.
Samtang nagapati naman si Pamplona Mayor Janice Degamo, ang asawa ni late Negros Oriental Governor Roel Degamo, nga ang kalinong ang mahimo mabalik kun madakpan na kag mapriso ang nagpatay kasubong man ang mastermind sa pag-assassinate sa iya bana.
Samtang ginpatuman naman ang gunban kag may ginplastar man nga mga checkpoints kag barikada sa probinsya.
Ginpasiguro man sang local government units sa mga residente nga wala sila sang dapat nga kabalak-an bangud ang tikang ang agud lamang mapasanyog ang seguridad.
Madumduman sang tinalikdan nga Sabado si Degamo ang nagasugilanon sa mga benepisyaryo sang Pantawid Pamilyang Pilipino Program (4Ps) program sa balay sini sa Pamplona, Negros Oriental, sang hinali na lamang nagsudlan ang mga armado nga indibidwal nga gilayon nga nagpaniro.
Ini ang nagtuga sang pagkapatay sang siyam ka persona, kalakip na ang gobernador, samtang 17 naman ang mga pilason nga ginabulong sa ospital.
