Plano ni Bacolod City Mayor Alfredo ‘Albee’ Benitez nga hugpungon ang mga pasilidad sang Bureau of Fire Protection, Police Station kag Disaster Risk Reduction and Management Office.
Suno sa alkalde, ini ang kabahin sa vision kadungan sa paglab-ot sa target nga Super City Bacolod.
Paathag sini nga sa karun pugtak-pugtak ang pwesto sang Bacolod Police Stations, Fire Stations kag Bacolod City DRRMO.
Sa karun may nagdonar na sang duta sa bahin sang Barangay Mandalagan nga ginalantaw mangin labing una nga clustered headquarters.
Paathag ni Benitez nga kun ulupod sa isa lamang ka lugar ang PNP, BFP kag CDRRMO, mas madasig ang pagresponder sa mga kalamidad kag insidente.
Dugang pa sang alkalde nga madamo sang magkaangay nga facilities kag equipments sa mga ahensya kun sa diin mas mangin mahapos para sa ila ang pagshare sang mga data kag equipments.
Nagapati ang alkalde nga ang plano nga magaresulta sa mas madasig kag epektibo nga performance sang mga first responders, ang nagakaangay gid para sa isa ka Super City.
Nagpasalig man ini nga ang Bacolod City Government, ang nakahanda man nga magsuporta sa mga kinahanglan sang nasambitan nga ahensya.
