Ginpangunahan sang Philippine National Police (PNP) Chief P/Gen. Debold Sinas ang Ground Breaking Ceremony sang Negros Occidental Police Provincial Office (NOCPPO) Transient Quarters sa Camp Alfredo M. Montelibano Sr., Bacolod City kahapon.
Ini ang pinakauna nga opisyal nga pagbisita sang nagapanguna nga opsiyal sa PNP sa NOCPPO.
Antes pa man ang seremonya, si Sinas, mga hepe sa PNP Directorates kag iban pa nga mga bisita ang nakigbahin sa V formation nga nagapakita sang kaangay nga porma sang popular nga anime series nga Voltes V nga nagapakita naman sang unity kag solidarity nga ginapromote sang PNP kasubong man sang ila mga stakeholders.
Ang iban pa nga mga bisita ang nagikan naman sa iban nga uniformed service kaangay sang Philippine Army, Philippine Air Force, Philippine Coast Guard (PCG) kag Bureau of Fire Protection (BFP).
Ginrepresentar naman sang mga Local Chief Executives nga ginpangunahan nanday Negros Occidental Governor Eugenio Jose “Bong” Lacson kag iban pa nga nagfacilitate sang pagpatigayon sang proyekto sa General Appropriations Act Fiscal Year 2021 sang Department of Public Works and Highways (DPWH).
Ang istraktura ang igatukod sa lugar kun sa diin nahamtang ang daan nga NOCPPO Apartment nga gintukod sang Hunyo 14, 1974 kag gin-inagurahan sang Abril 14, 1975.
Ang paghuman sa 12 ka kwarto nga transient quarter ang magasugod sa tion nga mapagwa na ang Special Allotment Release Order (SARO) gikan sa Department of Budget Management (DBM).
Ang kabug-usan nga pondo sang proyekto ang nagdangat sa P10 million.
Ginpasalamatan naman ni Sinas ang Abang-lingkod Party-List sa pagbulig agud nga masuguran ang proyekto.
Dugang pa sini nga sa tion nga matapos na ang proyekto, makabulig ini sa mga kapulisan nga gilayon nga makaplastar kag maghatag sang serbisyo.
Gindayaw man sang PNP chief si P/Col. Romy Palgue, Provincial Director sa NOCPPO para sa pagmintinar sang kalinong kag katawhay sa probinsya.
