BACOLOD CITY – Nag-alsa sang kamot ang masobra 800 ka mga bag-o nga recruits sang Philippine National Police sang ginpamangkot ni PNP Chief Director General Ronald “Bato” dela Rosa kun handa ang mga ini nga idestino sa ciudad sang Marawi.
Nangin dinapit nga bisita ang PNP Chief sa ginhiwat nga recognition rites sang Public Safety Basic Recruit Course sang Class Dakila sang Police Regional Office 6 kag Class Masiklab sang Police Regional Office 18.
Ang pagtapos sang 821 ka mga police trainees ginpatigayon sa Manuel Y. Torres Memorial Sports Center sa Barangay Balingasag, ciudad sang Bago kaina sang aga.
Sa pagsugod pa lamang sang iya panugdaon, gilayon ginpamangkot ni Dela Rosa ang mga police recruits kun luyag sang mga ini nga ipadala sa Marawi agud makig-away sa Maute Terror Group kag malipayon nga nag-alsa sang kamot ang mga ini.
Suno kay Gen. Dela Rosa, luyag lamang sini makasiguro nga nahangpan sang mga bagito nga pulis nga sila ang indi lamang katapo sang kapulisan sa Negros Island Region ukon Western Visayas kundi sang bug-os nga Pilipinas.
Sa 821 ka mga recruits, 520 sa mga ini ang iga-assign sa Police Regional Office Western Visayas (PRO-6) samtang ang 301 ang iga-deploy sa PRO-18 ukon sa Negros Island Region.
Samtang, ginpabati-batian sini ang mga katapo sang Maasin Municipal Police Station sa probinsiya sang Iloilo nga sadtong Domingo lamang ginsulod sang mga ginapatihan nga New People’s Army (NPA) kag nakuhaan pa sang mga armas kag patrol car.
Suno kay General Bato, indi ini maluyag sa mga pulis nga basta na lamang ginapanghatag sa mga rebelde ang ila mga armas nga wala man lamang nagabato.
Nahibaluan nga wala na nakahulag ang mga pulis kag ginhatag na lamang sa NPA ang ila armas kag matawhay nga nakapalagyo ang mga rebelde.
Samtang, gindugang pa sang PNP Chief nga indi ini maluyag sang mga pulis nga talawan kag labi sa tanan ang mga nagapakig-abyan sa mga ilegalista.
Suno kay General Dela Rosa, ang pagserbisyo sa Philippine National Police ang para sa pagpatuman sang layi kag indi agud mangin manggaranon ukon maghatag proteksyon sa mga sindikato.
