Ginpaandaman ni Philippine National Police Chief Police General Rommel Francisco Marbil ang mga kapulisan nga sila ang mangatubang sang disciplinary actions kun matukiban nga nagaprotekta sa illegal Philippine Offshore Gaming Operators (POGOs).
Suno kay Marbil, ang haligi sang pagserbisyo sa publiko sang kapulisan ang nakasandig sa integrity kag accountability, kag nagapabilin ang ila commitment nga masiguro nga nagasunod sa nasambit nga values ang mga Police officers.
Dugang pa sini nga ang polisa ang nagaserbe nga pahanumdom, nga ang pagsulod sa illegal nga aktibidad ang may kabaylo nga penalidad.
Ginpasanyog pa sang PNP ang efforts batok sa illegal POGOs nga nagresulta sa asod-asod nga madinalag-on nga mga operasyon.
Ginpangunahan naman sang Criminal Investigation and Detection Group (CIDG) kag Anti-Cybercrime Group (ACG) ang efforts sa pagdismantle sang madamo nga illegal POGO operations sa pungsod, nga nagresulta sa pagka-aresto sang mga imbulbado kag pagkumpiskar sang mga illicit equipment.
Sa POGO hub sa Porac, Pampanga, ang mga kapulisan kag Presidential Anti-Organized Crime Commission ang nakadiskubre sang mga items nga ginagamit sa pagtorture, kag mga device nga ginagamit sa pagclone sang SIM cards para sa pagsend sang text blasts.
Anom ka mga Chinese POGO workers naman nga nadakpan sa raid sa isa ka scam hub sa Bamban, Tarlac ang natukiban nga mga pugante sa China kag may warrant of arrest sa kaso nga fraud, pag-operar sang gambling dens kag iban pa nga krimen.
