Ginkondenar sang Philippine National Police (PNP) ang pagpanakit sa pito ka mga pulis matapos ang insidente sang riot sa isa ka rally sa Maynila sa Labor Day kahapon.
Suno kay PNP spokesperson PBGen. Randulf Tuaño, kalakip sa ginreklamo ang pagpanakit kag pagpangawat sang cellphone sa isa ka katapo sang kapulisan.
Suno diri, paga-imbestigahan ang insidente kag pasabton ang mga imbolbado.
Isa na diri ang isa ka raliyista nga hinali lang nanumbag sa isa ka pulis, nga nagresulta sa skull kag wrist injury.
Ang suspetsado ang gina-alegar may kaangtanan man sa pagkuha sang cellphone sang isa pa ka pulis.
Ginpahayag ni Tuanyo nga sila ang magpasaka sang nagakaigo nga kaso batok sa mga imbolbado.
Ginbatikos naman sang Kilusang Mayo Uno ang mga alegasyon sang PNP.
Suno kay KMU Vice Chair Lito Luces, maathag nga indi sila ang nag-una sa kinagamo.
Apisar sang nasambit nga insidente, ginpahayag sang PNP nga nangin matawhay ang ginpatigayon nga rally sa Maynila kag napatuman sang kapulisan ang maximum tolerance sa kabug-usan nga operasyon.
