Indi pabor ang Philippine National Police (PNP) nga magpabilin sa ila custodial center si Kingdom of Jesus Christ (KOJC) leader Pastor Apollo Quiboloy.
Suno kay PNP spokesperson Col. Jean Fajardo, ang mga naaresto nga mga indibidwal ang dapat napriso sa mga pasilidad sang Bureau of Jail Management and Penology (BJMP).
Ginpaanggid ni Fajardo ang kaso ni dismissed Bamban, Tarlac Mayor Alice Guo nga sa karun yara sa kustodiya sang Pasig City Jail Female Dormitory.
Suno diri, luyag sang PNP nga ang mga maaresto nga indibidwal, apisar sang ila status sa kabuhi ang dapat magtinir sa Bureau of Jail Management and Penology.
Sa karun, suno kay Fajardo, nasumiter na sang PNP sa Pasig Regional Trial Court ang medical evaluation nga ginpatigayon sang PNP General Hospital kay Quiboloy.
Ini ang mangin basehan sang korte sa pagdesisyon kun dapat nga sayluhon ukon mapabilin si Quiboloy sa PNP Custodial Center may kaangtanan sa kaso nga qualified human trafficking nga ginapangatubang sini.
