Gin-athag ni Police Colonel Allen Rae Co, Chief sang Public Information Office sang Philippine National Police (PNP), nga daan na kag masobra tatlo ka tuig nga nakuha ang litrato nga nagalapta sa social media nga nagapakita kay Sen. Ronald “Bato” Dela Rosa kaupod ang pila ka mga indibidwal sa isa ka sementeryo.
Ang pag-athag ang kasunod sang paglapta sang litrato sa social media subong nga Undas nga nagtuga sang espekulasyon nga liwat nakita ang senador sa Digos City, Davao del Sur, sa tunga sang padayon nga pagpangita sa iya sang mga otoridad.
Madumduman nga padayon nga ginapangita sang mga otoridad si Dela Rosa kaangot sang arrest warrant nga ginpagwa sang International Criminal Court (ICC) bangud sa ginaalegar nga crimes against humanity nga may kaangtanan sa war on drugs sang nakaligad nga administrasyon.
Nagtanyag man ang Department of the Interior and Local Government (DILG) sang P50 million nga padya sa sin-o man nga makahatag sang impormasyon nga magatudlo sa ginahamtangan sang senador kag mangin palaagyan sa iya pagkaaresto.
Sa karun, wala sa gihapon natumod sang mga kapulisan kun sa diin nagapanago ang senador.
