Matawhay kag malinong nga selebrasyon sang paskwa ang tinutuyo sang pagtukod sang Philippine National Police sang Oplan Ligtas Kapaskuhan.
Sa interview sang Bombo Radyo kay Bacolod City Police Office spokesperson Police Lt. Col. Ariel Pico, ginamaximize sang PNP ang mga personnel agud nga magtrabaho ukon magperform sang ila duties and responsibilities.
Tinutuyo man sang nasambit nga programa ang pagpasiguro nga wala sang dalagko nga insidente nga matabo samtang ginasaulog ang paskwa.
Suno kay Pico, bisan ang mga personnel nga nagaschooling ang required nga magreport sa malapit nga police station.
Ginakabig man sang tagpamaba sang BCPO nga pinasahi ang pagpatigayon subong nga tuig sang simbang gabi bangud may ginapatuman nga minimum health standards.
Ginpasalamatan man sini nga ang mga pumuluyo ang nagasunod sang minimum health protocols kag wala man sang nagapakatig-a kun sawayon agud magsunod sa minimum health protocols.
Nagpanugyan man ini nga wala sang may magpalupok sa ugsaran sang balay bangud sa tion nga madakpan sang otoridad may yara sang multa nga P20 mil tubtob P30 mil kag pagkapriso nga anum ka bulan tubtob isa ka tuig.
Ginpahayag man ni Pico nga ang pagsulit-sulit sa pagbayolar sang minimum health standards ang gina-issuehan sang citation ticket agud magserbe nga leksyon sa mga violators.
