Ipatuman sang Philippine National Police (PNP) ang maximum tolerance sa mga natalana nga magpatigayon sang protesta kadungan sang 49th Association of Southeast Asian Nations (ASEAN) Summit sa pungsod.
Suno kay PNP chief General Jose Melencio Nartatez Jr, handa sila nga maghimo sang tikang batok sa anuman nga hitabo nga mahimo makaapekto sa pagtilipon.
Ginganyat man niya ang mga raliyista nga magtuman sa apela sang Asean National Organizing Council’s security officials nga kun mahimo ipaiway na lamang ang pagprotesta.
Una na nga nag-anunsyo ang pila ka mga progresibo nga grupo kaupod ang pila ka mga transport group nga sila ang magpatigayon sang hublag protesta kadungan sang pag-abot ni US President Donald Trump.
Kahapon, ang PNP nagpatigayon na sang ceremonial send-off sang mga security personnel para magpatuman sang seguridad sa mga VIP.
Sa pihak nga bahin, nagdeploy ang PNP-Highway Patrol Group (PNP-HPG) sang 716 ka mga kapulisan para sa nasambit nga event.
Sila ang magaserbe bilang escorts sang mga magatambong nga mga lider.
Ang deployment ang ginalakipan sang entry riders, motor vehicle escorts, kag general motor vehicle crews, santo sa PNP-Highway Patrol Group (PNP-HPG).
Ang 49th ASEAN Summit nga maga-umpisa sa Nobyembre 15 tubtob 17 ang pagatambungan sang mga delegasyon naggikan sa 11 member states kasubong man sa mga dialogue partners nga China, South Korea, Japan, US, Australia, New Zealand, India, kag Canada.
Masobra 23,000 ka mga security personnel ang ipahamtang sa mga lugar kun diin hiwaton ang pagtilipon kaangay sang Philippine International Convention.
