Nagtukod sang task group ang Philippine National Police agud magpatigayon sang imbestigasyon sa pagcrash sang isa ka helicopter sini sa Quezon Province kun sa diin nadulaan sang kabuhi ang isa ka pulis.
Suno kay PNP spokesperson Police Col. Jean Fajardo, ini ang ginalakipan sang pila ka mga branch sang PNP kag kabulig man sa imbestigasyon ang Civil Aviation Authority of the Philippines.
Nalakip sa ginalantaw nga posibilidad amu ang mechanical, technical kag human error nga rason kun ngaa nagcrash ang H125 Airbus helicopter sa banwa sang Real.
Suno kay Fajardo, tanan ginakonsiderar sang PNP kun ano ang nangin rason apang sa karun sarang lamang sila nga makaspekular kun ano ang actual nga mangin problema sang chopper, kun ini ang technical, mechanical ukon human error.
Suno diri, tanan ini ang magagwa sa imbestigasyon nga patigayunon sang PNP sa bulig sang CAAP.
Sa karun, nagapabilin sa PNP General Hospital ang mga napilasan.
Gindugang man ni Fajardo, santo sa initial medical assessment sa duha ka mga piloto, gin-airlift na ang mga ini sa PNPGG kun sa diin nagsuprer sila sang pila ka mga contusion, laceration kag may fracture apang ang isa sa mga ginconfine ang nadulaan gid sang kabuhi.
Sa report nagikan sa air unit sang PNP, alas 6:17 sang aga sang naglupad ang helicopter nagikan sa Manila Domestic Airport sa Pasay City padulong sa Balesin Airport agud sugaton si Carlos kag ang mga kaupdanan sini.
Suno kay Fajardo, dapat kuntani nga nakaland na ang helicopter sa Balesin Airport alas 6:55 sang aga apang nadulaan ini sang komunikasyon.
Alas 8:05 sang aga, nakabaton ang Quezon Real Municipal Police Station sang tawag nagikan sa air unit nga nagahingyo nga ilocate ang chopper kag didto nadiskubrehan nga nag-crash ang chopper sa may Barangay Pandan, Real, Quezon.
Nagdangat naman sa masobra tatlo ka oras antes natultulan sang rescue team ang crash site bangud may kalayuon ini nga 13 kilometro nagikan sa ciudad ang crash site.
Sa karun grounded ukon indi na anay pagpaluparon ang 5 Airbus H125 helicopter samtang ginahulat ang resulta sang imbestigasyon.
