Ginmanduan sang Philippine National Police ang mga personnel sini nga pasanyugon pa ang “security operations” samtang nagahilapit ang pagtakop sang filing sang certificates of candidacy (COC).
Suno kay PNP chief Police General Rommel Marbil, bangud sa nagainit nga political climate, critical ang ila nga role sa pagsiguro sang patas nga environment sa tanan nga kandidato kag sa publiko gani nagamando ini sa tanan nga police units nga i-intensify ang security operations ilabi na sa traditional election hotspots kun sa diin masami nga naga-escalate ang tension.
Suno sa iya, ginahatagan nila sang extra nga atensyon ang mga rehiyon nga nakitaan sang mataas nga aktibidad nagikan sa mga armado nga grupo kag criminal elements.
Dugang pa sini nga indi pagpahanugutan sang ahensya ang maskin ano nga pagpamahog nga makaapekto sa democratic process bangud ang ila primary objective amu nga mapunggan ang maskin ano nga sahi sang violence ukon intimidation.
Ginhangkat man sini ang publiko nga ireport ang mga makaduluda nga mga aktibidad sa period sang COC filing nga magatakop sa Oktubre 8.
