Nagahanda na ang Bacolod City Police Office sa palaabuton nga anibersaryo sang Communist Party of the Philippines – New People’s Army sa Disyembre 26.
Sa interview sa Bombo Radyo kay BCPO Spokesperson Police Lieutenant Colonel Ariel Pico, ginpahayag sini nga yara na sa full alert status ang BCPO kaangot sa palaabuton nga ika-51 nga anibersaryo sang CPP-NPA.
Suno kay Pico, apisar nga wala sila sang may nabaton nga pamahog, wala sila nagakompyansa kag nagapadayon ang ila nga pagbantay.
Suno sa iya, may yara sang apat tubtob lima ka mga pulis nga nagabantay sa gwa sang presinto kun gab-i kag may yara man sang mga police assistance desk nga ginpangbutang sa mga dalanon.
Gindugang niya man nga cancelled ang tanan nga leave sang mga pulis magluwas sa sick leave bangud dako ang posibilidad nga mangharass ang mga komunista.
Aminado man ang BCPO spokesperson nga madamo sila sang kakulangan kapin na sa ila nga mga kagamitan apang nagpasalig ini nga ginaubra nila ang ila nga masarangan agud mahatagan sang seguridad ang syudad.
Nagahanda man ang Philippine Army sa palaabuton nga anibersaryo sang Communist Party of the Philippines – New People’s Army sa Disyembre 26.
Sa interview sa Bombo Radyo kay Brigadier General Benedict Arevalo, Commander sang 303rd Infantry Brigade, ginpahayag sini nga apisar nga may yara sang direktiba nga ceasefire sa tunga sang CPP-NPA kag Philippine Army, padayon sila nga nagapreparar sa palaabuton sini nga anibersaryo.
Suno kay Arevalo, dapat nga mangin alerto sila bangud pa-traidor ang istilo sang mga komunista.
Apisar nga magdeklarar sang ceasefire ukon peacetalk suno sa commander, padayon sa gihapon ang NPA sa pagpang-ambush gani wala ini gihapon sang pulos.
Apang suno sa iya, sundon nila sa gihapon kun ano man ang direktiba nga ihatag.
Ginkompirmar man sini nga may yara sila sang Christmas break agud himuon ini nga by batch ukon rotation agud nga indi mameligro ang depensa.
Nagpangabay man si Arevalo nga kuntani magbalik na sa sabak sang gobyerno ang NPA kag mag-avail sang reconcilation program agud nga makaupod nila ang ila nga pamilya sa paskwa.
Nagpasalig man ini nga may yara ukon wala man sang ceasefire, himuon gihapon sang Philippine Army ang ila nga obligasyon.
