Ginpahamtangan sang police assistance desk sang city director sang Bacolod City Police Office ang tanan nga mga simbahan sa ciudad sang Bacolod kadungan sang pag-umpisa sang pagpatigayon sang misa de gallo ukon simbang gabi.
Sa interview sang Bombo Radyo Bacolod kay Police Lt. Col. Ronnie Brillo, deputy city director for operations sang Bacolod City Police Office, nagmando na si Bacolod City Police Office director Police Col. Noel Aliño sa mga station commanders sang napulo ka police stations sa ciudad sang Bacolod nga magbutang sang police personnel sa tagsa ka mga simbahan nga magastation sa police assistance desk agud nga may palapitan ang mga pumuluyo nga nagsimba.
Suno kay Brillo, magluwas sa police assistance desk sa simbahan may yara man sang mga kapulisan nga magalibot sa vicinity sang simbahan agud nga masiguro ang seguridad sang mga nagasimba.
Tsekyaron man sang mga kapulisan ang mga ginpabay-an nga mga bagahe kag magarobing man ini agud nga malikawan ang insidente sang mga pick pockets kag iban pa.
Kadungan sang pag-umpisa sang simbang gabi, gin-activate man sang BCPO ang Task Force Bantay Hold upper at Akyat-Bahay agud nga malikawan ang insidente sang pagpangawat samtang nagatambong sa misa de gallo ang mga pumuluyo sa ciudad sang Bacolod.
