Ginkumpirmar ni Police Attache Col. Moises Villaceran sa Washington DC, USA nga magapatigayon kuntani sang exit call si Police Col. Pergentino Malabed Jr., ang chief sang PNP Supply Management Division nga sakay sang passenger jet nga nagcrash sa US Army helicopter malapit sa Reagan National Airport.
Sa interview sang Bombo Radyo Bacolod kay Villaceran, si Malabed ang gikan sa India agud magtsekyar sang ginpurchase nga armored vest.
Dala ang sample, siya ang naglupad padulong sa Kansas, USA sa mismo nagahimo sang armored vest, dala ang samples kag ang specs nga kinahanglan.
Ini agud maseguro ang kalidad sang armored vest nga ginasuksok sang mga kapulisan.
Bangod sila ang ara na sa Estados Unidos, antes magpauli kaangay nga protocol na ang pagpatigayon sang exit call.
Agud makatipid, ginpili ni Malabed nga siya na lamang ang magatabok sa Washington samtang ang duha ka kaupod ang magahulat na lamang sa iya sa Chicago para sa flight pabalik sa Pilipinas.
Suno kay Villaceran, nakabatun sila sang memo tuhoy sa mga aktibidad ni Malabed apang wala sila nakahibalo kun ano nga adlaw ukon oras ini magapadulong sa Washington.
Nahibaluan lamang sini nga nakaupod si Malabed sa American Airlines 5342 nga nagcrash sa Black Hawk helicopter, sang makita sa nabatun nga kopya sang plane ticket.
Sa karun, ginatinguhaan sang PNP nga mabuligan ang pamilya sang biktima, kun sa diin yara na sa Washington ang utod sini, kag ang iloy ang ginbaklan nila mismo sang plane ticket kag ginpaupdan sa PNP personnel sa byahe.
Natumod naman ang identity sang bangkay paagi sa fingerpint nga nagmatch sa yara sa record sang Philippine Embassy.
