Ginrelieve si Police Brigadier General Leo Francisco bilang regional director sang Police Regional Office 6 .
Sa interview sang Bombo Radyo kay Police Major Mary Grace Socorro Borio, spokesperson sang PRO6, ang ini nga tikang ang kabahin sang career advancement kag promotion ni Francisco bangud siya ang iga-assign sa Kampo Krame kag magaserbi nga officer-in-charge sang Directorate for Operations.
Suno kay Borio, ila nabaton ang order kag epektibo kahapon, Mayo 8.
Temporaryo naman nga magaserbi bilang OIC sang PRO6 si Deputy Regional Director for Adminisration Brigadier General Archival Macala samtang ginahulat pa ang mando nagikan sa PNP kun sin-o ang magabulos kay Francisco.
Suno sa tagpamaba, ila ginakasubo nga magabiya na sa PRO6 si Francisco apang ila ginakalipay ang promotion sini kag sila nagapasalamat sa iya mga nahimo sa iya pagpamuno.
