Wala na nakabalik sa pagtulog ang chief of staff sang Philippine National Police (PNP) Internal Affairs Service matapos nga nakapasar kag nagpangaduha sa 2020 Physician Licensure Examination ang anak sini nga si Dr. Patrick Joseph Mabugat.
Sa interview sang Bombo Radyo Bacolod kay Police Col. Calixto Mabugat, tuman ang kalipay sini sang nabaton niya ang tawag sang iya asawa nga nagpangaduha ang ila anak gani nadula ang kakapoy nga iya nabatyagan.
Proud ini bilang ginikanan bangud nahatagan na sang katumanan ang handum sini nga mangin madinalag-on ang anak sini.
Malipayon man ini nga ipakigbahin sa bug-os nga Bacolodnon ang kadalag-an sang ila anak kasubong man sang ila pamilya.
Suno sa iya, indi imposible nga malab-ot ang handum kun may yara sang determinasyon kag pagtuo sa Ginoo.
Utang man sini sa iya asawa ang pagpadako kag kadalag-an sang ila mga anak bangud masami ini nga malayo bangud sa iya trabaho.
Ginlaragway man sini nga responsable kag determinado si Dr. Patrick Joseph Mabugat bilang subang ka anak.
Nagapati man siya nga sa tion nga magtukod sang iya kaugalingon nga pamilya ang anak sini, mangin maayo ini nga amay.
Aminado si Col. Mabugat nga istrikto siya nga amay kag ginsiguro sini nga nagatutok ang ila anak sa ila pagtuon.
