Aminado ang provincial director sang Negros Oriental Police Provincial Office nga aksidente ang natabo sa Brgy. Rizal, San Carlos City apang atubangon sang driver ang kaso nga ipasaka batok sa iya.
Sa interview sang Bombo Radyo kay Police Col. Germano Mallari, mahimo nga may kapaltahan sa bahin sang driver bangud wala naggana ang preno samtang lubos naman ang ila nga paghalong.
Suno diri, subong nga adlaw igafile ang kaso batok sa driver kun sa diin ang misis ni Police Lt. Col. Ruben Verbo ang magaserbe nga complainant.
Sa karon, yara na sa Dumaguete si Mallari kag wala man ini sang kapilasan.
Ang isa ka sibilyan kag isa ka pulis nga kaupod nila ni Verbo ang yara naman sa hilway nga kahimtangan magluwas lamang sa partner ni Verbo nga nag-agom sang fracture.
Nagalaom naman si Mallari nga mabaton sang pamilya Verbo ang masubo nga natabo bangud wala man sila sang kapaltahan.
Nagpanugyan man ini sa mga motorista nga siguruhon ang kondisyon sang salakyan agud indi makahalit sa iban nga motorista nga nagahalong. SAMTANG…nagpaathag si Police Col. Germano Mallari kun ngaa motorsiklo ang iya ginsakyan kag indi ang service vehicle nga issued sang Philippine National Police sang nagpadulong ini sa Bacolod agud makigsapol kuntani kay Police Col. Leo Pamittan, director sang Negros Occidental Police Provincial Office.
Sa interview sang Bombo Radyo kay Mallari, gin-eksplekar sini nga anay head sang Police Community Relations Office sang Negros Oriental PPO ang kaupod niya kahapon nga si Police Lt. Col. Ruben Verbo.
Apang sang Miyerkules, nagpungko si Verbo bilang OIC chief sang Guihulngan City Police Station.
Suno kay Mallari, magakadto sila kuntani sa Negros Occidental PPO para sa coordination meeting sa dulunan sang duha ka probinsya.
Bangud mahilig sila sa motorsiklo, gin-ulayhon nalang kuntani ang hobby sa rides sa ila official function.
Sang nagabyahe, nauna ang sibilyan nga ila man nga abyan, nagasunod si Verbo kag pangatlo si Mallari.
Nakita man ni Mallari ang pagbunggo kanday Verbo bangud 50 metros ang antad niya sa duha.
Ang sibilyan ang nakalumpat sa motorsiklo apang wala nakatigayon si Verbo kag ang iya partner gani nadusdos ini sang truck antes natumba.
Nakalikaw naman si Mallari paagi sa pagkadto sa pihak nga lane sang dalan antes naglumpat nagikan sa motorsiklo.
Ang motorsiklo naman nga nagasunod sa provincial director ang ginamaneho sang police staff sergeant kag nakadanlog ini bangud naula na ang graba apang hilway ang rider magluwas lamang nga nakakas ang nawala nga signal light sang motorsiklo.
May tatlo man ka motorsiklo nga nauna apang wala man sila nahalitan.
