Lantawon pa sang bag-o install nga officer-in-charge sang Bacolod City Police Office ang sitwasyon sang nagluntad nga mga krimen sa ciudad sang Bacolod antes magdihon sang tikang kun paano ini resolbahon.
Sa interview sang Bombo Radyo Bacolod kay Police Col. Joeresty Coronica, wala pa sini mapicture-out gid kun ano ang mga nagkalatabo nga krimen sa ciudad sang Bacolod apang nagapati ini nga ang sitwasyon sa ciudad ang indi maglayo sa ciudad sang Iloilo kun sa diin ini naghalin bilang city director sang Iloilo City Police Office.
Suno kay Coronica, ang epektibo nga template nga gingamit sini sa pagpamuno sang ICPO ang gamiton man sa ciudad sang Bacolod.
Ginpasalamatan man ni Coronica ang pagsalig nga ginhatag sang regional director sang PRO 6 kasubong man ang pagsalig kag oportunidad nga ginhatag ni Bacolod City Mayor Alfredo Benitez nga magserbe ini bilang pinuno sang BCPO.
Ginpahayag man sini nga isa sa iaddress sini amo ang problema sa illegal nga druga bangud nagapati ini nga kun maresolbar ang ini nga problema, maresolbar man ang iban nga krimen nga nagakatabo bangud man sa illegal nga druga.
Samtang, mensahe sini sa mga kapulisan nga ipabilin ang good service reputation bangud ini ang mabilin sa mga kabataan kag ang maayo nga reputasyon ang madala bisan magretiro na sa serbisyo bangud ini ang nagatatak sa mga pumuluyo.