Nadesisyunan sa ginpatigayon nga Regional Joint Security Control Center meeting sang Lunes nga magpadala sang dugang nga police personnel sa Negros Oriental.
Ini matapos makita nga kulang ang mga kapulisan sa nasambit nga probinsya agud magsiguro sang seguridad sa May 12 midterm elections.
Ang 310 nga kulang nga police personnel sa Negros Oriental ang pagakuhaon sa Bacolod City Police Office.
Suno kay COMELEC Negros Island Region Director Atty Lionel Marco Castillano, ang ginsolusyunan sang mga ini ang kakulangan sang police personnel sa Negros Oriental.
Suno kay Castillano, maayo lang nga natukod na ang Negros Island Region gani makapull out sang police personnel nagikan agud nga temporaryo nga ideploy sa Negros Oriental.
Suno diri, wala man sang dapat kabalak-an ang Bacolod City bangud ang pag pullout sang personnel temporaryo man lamang bangud magaserbe lamang ang mga ini sa tion sang piniliay.
Ang personnel sang Bacolod City Police Office ang nagasulobra bangud sa karun masobra ang mga ini sa isa ka libo gani diri ginkuha ang temporaryo nga gindeploy sa Oriental.
Sa pihak nga bahin, wala sang may namutikan nga intense political rivalry sa Negros Oriental ilabi na sa Third District.
Suno sa COMELEC NIR Director, matawhay kag ang away sa kampanya ang makita lamang sa social media.
