Naghatag sang ultimatum ang deputy city director for operations sang Bacolod City Police Office (BCPO) sa mga drug personalities nga magpadulong sa iya opisina kag itu-ad kun sin-o ang protektor sang mga ini sa operasyon sang iligal nga druga sa ciudad sang Bacolod kag bilog nga probinsya.
Sa interview sang Bombo Radyo Bacolod nga si Lt. Col. Jovie Espenido, tubtob Enero 31 lamang ang mahatag niya sa mga personalidad nga imbolbado sa iligal nga druga agud magpadulong sa iya nga opisina.
Mahimo man sila nga mag-upod sang mga barangay officials ukon sin-o nga mga personalidad agud nga indi sila pagkulbaan sa pag-istorya sa iya.
Dugang pa sini, luyag niya nga mahibaluan kun sin-o ang yara sa likod sang mga drug personalities sa Bacolod kag bug-os nga Negros Occidental agud nga makasugod na siya sang iya nga operasyon sa mas madali nga panahon.
Paathag ni Espenido, iya nga pagatutukan ang mga drug protectors bangud indi man mag-duging ang iligal nga druga kun wala sila.
Dugang pa sini nga indi siya makapasalig nga wala sang patyanay nga matabo apang iya gin-athag nga kun mahimo nga malikawan ini, likawan niya gid bangud indi niya man luyag nga mag-utas sang kabuhi sang isa ka tawo.
Gani, nagapanawagan siya sa mga drug personalities nga kun mahimo, magpakig-angot na sa iya tubtob sa katapusan sang bulan agud nga mangin matawhay kag masulhay ang pagpanguna sini sa kampanya batok sa iligal nga druga sa ciudad sang Bacolod.
