Gin-athag sang Philippine National Police nga himuon ni Police Lt. Gen. Vicente Danao ang bag-o niya nga task sa idalom sang OIC capacity matapos gin-appoint ni Presidente Rodrigo Duterte bilang officer-in-charge sang PNP.
Kahapon, gin-anunsyo ni Interior kag Local Government Secretary Eduardo Anio ang appointment ni Danao may kaangtanan sa pagretiro sa serbisyo ni PNP chief General Dionardo Carlos sa maabot nga Mayo 8 ukon isa ka adlaw antes ang Eleksyon.
Sa mensahe sang opisyal, gindesignate sang presidente si Police Lt. Gen. Vicente Dupa Danao Jr. bilang officer-in-charge sang Philippine National Police agud buslan si Police General Dionardo Carlos, nga magaretiro sa Mayo 8, 2022.
Una na nga ginpahayag ni Anio sa Bombo Radyo nga duha ka pangalan sang PNP officers ang iya ginsumiter kay Presidente Duterte kalakip na ang PNP Deputy Chief for Operations nga si Danao Jr., nga miyembro sang Philippine Military Academy (PMA) Class of 1991.
Una naman nga nareport nga kun ang PNP leadership ang pagasundon, si PNP Deputy Chief for Administration Lt. Gen. Rhodel Sermonia sang PMA of 1989 ang otomatiko nga magasunod sa pwesto.
Naggwa man ang pangalan ni National Capital Regional Police Office Chief M/Gen. Felipe Natividad nga miyembro sang PMA Class of 1990.
Suno sa PNP, si Danao ang magaperform sang iya bag-o nga task sa OIC capacity bangud ginadumilian ang movement sa government positions sa tion sang election period.
