Posible nga ma-relieve sa pwesto ang hepe sang Bacolod Police Station 3 nga si Police Major Ruel Culanag kasunod sang pagpalagyo sang apat ka mga priso kahapon sang kaagahon.
Sa interview sang Bombo Radyo Bacolod kay Bacolod City Police Office (BCPO) director Police Colonel Henry Biñas, ginpahayag sini nga iya na karon ginapatun-an kay P/Lt. Col. Ariel Artillero, pinuno sang investigation and detective management section, kun ano ang atubangon nga kaso ni Culanag magluwas sa neglecting of command responsibility.
Apang, ginpasiguro naman ni Biñas nga magapangatubang gid sang criminal case nga infidelity in the custody of the prisoners sanday Police Corporal Orweyn Jade Nadado nga Desk Officer kag Police Staff Sergeant Eric Olverio nga Jailer sang nasambit nga police station.
Samtang ginapatun-an pa sini kay Artillero ang administrative case nga ipasaka sa duha.
Nahibaluan nga ginpapriso kahapon ni Biñas sanday Nadado kag Olverio kasunod sang natabo nga pagpalagyo sang apat ka mga priso.
Suno pa sang city director, wala sini ginakonsiderar ang rason nga mga daan na ang selda.
Paathag sini, responsibilidad sa gihapon sang mga pulis nga bantayan ang mga priso.
Dugang pa ni Biñas, apisar madakpan pa ang mga jail breakers, may pangatubangon sa gihapon nga liability sanday Culanag kag ang duha ka mga personnel.
Indi naman madugangan ang kaso sang apat ka mga priso nga nakapalagyo bangud detention prisoners lamang sila kag indi pa convicted prisoners.
