Yara pa gihapon sa ospital ang pulis nga nagluthang sang mag-amay sa Barangay Canjusa, Pulupandan kadungan sang Paskwa, Disyembre 25.
Madumduman nga ang biktima amo sanday Joman Fuentes, 21 anyos, single, construction worker, nga ginbawian sang kabuhi samtang pilason naman ang iya nga amay nga si Jomarie Fuentes, 52 anyos, kasado, construction worker.
Ang suspect amo si Police Corporal Armin Alanza, 36 anyos, residente sa lugar, apang assigned sa 604th Company sang Regional Mobile Force Battalion 6 sa Southern Negros.
Sa interview sang Bombo Radyo Bacolod kay Police Captain Judesses Catalogo, spokesperson sang Negros Occidental Police Provincial Office, nafile na ang kaso nga homicide sa pulis samtang nagpahayag naman ang amay nga matapos na lamang sang lubong sang iya bata bwas Enero 4, amo magapirma para sa pagfile sang dugang nga frustrated homicide sa suspect paagi sa regular filing.
Magluwas diri, ginahitso naman ang administrative case nga ipasaka batok kay Alanza, nga mahatagan sang lima ka adlaw nga tion agud kun luyag magfile sang counter affidavit.
Madumduman nga ginsapote ang pulis gani siya ang na-ospital kag sa karun wala pa sang medical bulletin ang NOCPPO kun kumusta ang kondisyon sang suspect.
Si Alanza ang ipaidalom sa hearing, kag pasalig ni Catalogo nga tinguhaan nila nga mapadasig ang paghatag sang hustisya sa biktima.
