Magapakasal na kuntani sa bulan sang Desyembre ang 43 anyos nga pulis nga napatay sa engkwentro sang mga katapo sang Calatrava Municipal Police Station kag New People’s Army (NPA) sa Sitio Kalanugan, Barangay Minapasuk, Calatrava, Negros Occidental kahapon sang aga.
Madumduman nga samtang padulong sa Sitio Upper Ikugan, Barangay Minapasuk, nagluntad ang engkwentro nga nagresulta sa pagkamatay ni Police Corporal Jayme Nuñez samtang pilason naman sanday Police Capt. Jesus Alba, ang deputy chief of Police kag Police Corporal Dennis Nasis.
Sa interview sang Bombo Radyo Bacolod kay Nida Nuñez, iloy ni Police Corporal Jayme Nuñez kag residente sa Purok Mahidaeton, Barangay Paraiso, Sagay City, ang biktima ang bugtong lamang sini nga lalaki sa apat ka kabataan.
Ini man ang nagaisahanon nga pulis sa ila nga pamilya.
Ginpakigbahin man sang iloy nga natalana na kuntani nga magpakasal ang iya nga bata sa long time girlfriend sini sa Desyembre.
Pahayag sang iloy nga wala gid ini sang problema sa iya bata bangod ini ang wala sang gamo, samtang nagtinguha gid ini nga makatapos sang naga-eskwela pa lamang.
Sa pito ka tuig sini sa serbisyo, siya ang na-assign naman sa Iloilo, Janiuay, Moises Padilla samtang pila ka bulan pa lamang ini sa Calatrava Municipal Police Station.
Ginsaysay sang iloy nga nakasugilanon pa sini ang iya nga bata sang Martes sang gab-i bangod didto ini nagpanyapon sa balay sang pulis sa Cadiz City kag siya ang gindul-ong pa sini pauli.
Ang bata sini ang masami man nga nagapauli sa ila sa Sagay kun day-off kag sila ang ginalutuan sang sud-an.
Kahapon sang aga, nakatext pa sini ang bata kun sa diin siya ang naghingyo nga maghapit sa ila bangod siya ang wala na sang bulong.
Nakasabat naman si Corp Nuñez nga siya ang magapadulong na lamang sa iloy pag abot sang sweldo.
Apang sang udto kahapon, nabalitaan na lamang sang nobya sang pulis nga may engkwentro nga nagluntad sa tunga sang Calatrava Municipal Police Station kag NPA.
Sa tuman nga kakulba, madamo sa ila pamilya ang nagpadulong sa estasyon tubtob nga nakita na nila ang mga litrato kag video nga nagapakita nga ang ila nga bata ang napatay sa engkwentro.
Halos malipungan naman ang iloy kag naglain ang pamatyag sang mahibaluan ang balita.
Pahayag sini nga tuman ka sakit bilang isa ka iloy nga kuhaan sang nagaisahanon nga bata nga lalaki.
