Natalana nga iga-inquest ang kaso batok kay Patrolman Alvin Rios, ang pulis nga nagluthang patay sa isa pa ka pulis matapos sini maaktuhan nga hublas samtang yara sa kwarto sang ila balay upod sa iya live in partner kag anom ka bulan nga lapsag.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 8, nakumpleto na nila ang mga papeles para sa pagpasaka sang kaso kag ginatinguhaan nga mapasaka bwas, Lunes, Hunyo 3.
Suno kay Tolentino, cooperative man si Rios sa ginapatigayon nga imbestigasyon.
Suno sa station commander padayon pa ang ila nga pagprocess agud nga mahibaluan ang rason sa likod sang shooting incident.
Ginpahayag man sini nga ginahulat pa tubtob sa karun ang resulta gikan sa crime lab agud nga matumod kun sa diin ang pilas sang biktima nga gintunaan sang kamatayon sini.
Samtang nakadepende naman sa assessment sang city prosecutor kun ano nga kaso ang ipasaka sa suspek.
Nagpanugyan man si Tolentino nga kun may ginaagyan nga kabudlayan mas maayo nga magpalapit sa mga kakilala kag mga may edad ukon religious leader agud nga magiyahan kag makalikaw sa paghimo sa indi maayo nga butang.
Ginpasalamatan man sini ang pamunuan sang Bacolod City Police Office sa pagpanguna ni Police Col. Noel Aliño nga ginabuligan gid sila agud nga mahatagan sang hustisya ang natabo sa biktima.
