Ginpromote bilang Police Major General ang tumandok sang ciudad sang Bacolod.
Sa interview sang Bombo Radyo kay Police Major General Roderick Augustus Alba, ang promotion sini ang magaserbe bilang inspirasyon kag disiplina sa mga kaupod sini sa serbisyo kasubong man sa mga luyag nga mangin pulis.
Suno diri, 34 ka tuig na ini sa serbisyo kag masami nga wala ini sa mga importante nga okasyon kaupod ang iya pamilya bangod sa trabaho sini.
Apang, ini ang iya gina-instindi bangod nga luyag niya nga magserbisyo agud mapabilin ang peace and order sa komunidad.
Aminado man ini nga isa pa gid sa pagpanghangkat sa iya trabaho amo nga indi tanan naga-upod kag nagasunod sa pag-oserba sang layi kag kinamatarong sang tawo.
Apang suno kay Alba, dako ang iya pagpati nga basta yara ang komunidad nga naga-upod sa mga kapulisan sa pagbag-o, mas mahapos ang trabaho.
Nagpanawagan ini sa tanan nga indi pagdulaon ang paglaum sa pungsod bangod may yara sang mga maayo nga mga tawo nga nagatrabaho sa pagpasanyog sang kalinong.
Mensahe sini sa tanan nga may luyag nga mangin kabahin sang Philippine National Police amo ang magdamgo, magbugtaw kag magtrabaho nga matuman ini.
