Nagikan sa masobra 5,000 ka organic police personnel sa bilog nga Western Visayas, may isa ka personnel nga assigned sa Negros Occidental nga nagpositibo sa illegal drug use kadungan sang mandatory drug test nga ginpatigayon sang Hulyo 8.
Ang drug test ang ginpatigayon bilang kabahin sang kampanya ni PRO 6 director Police Brigadier General Sidney Villaflor sa internal cleansing kun sa diin tanan nga personnel ang nagpaidalom sa test.
Sa kabug-usan, 2,600 ang police personnel nga assigned sa idalom sang NOCPPO.
Suno kay NOCPPO spokesperson Police Capt. Judesses Catalogo, nakibot man ang NOCPPO nga may isa ka personnel nga nagpositibo sa illegal drug use kag wala pa ini nahingadlan.
Suno diri, ginarelieve sa posisyon ang nagpositibo kag ginaassign sa holding and accounting unit sa provincial headquarters.
Ang natungdan nga pulis ang sarang maka-contest sa resulta sang drug testing.
Igapaidalom naman sa confirmatory test sa National Confirmatory Commission sa national headquarters ang pareho nga specimen, kag sa tion nga positibo sa confirmatory test, ini ang final na nga resulta nga pagabasehan para sa sanction batok sa iya.
Suno kay Catalogo, ginasunod ang husto nga procedure sa anuman nga administrative case sang pulis.
Sa tion nga guilty ang isa ka pulis, ang illegal drug use ang tantamount sa dismissal sa serbisyo.
