Apisar nga wala pa sang memorandum gikan sa National Headquarters sang Philippine National Police (PNP), gina-abiso na sa mga police personnel sa Negros Occidental Police Provincial Office (NOCPPO) ang pagparehistro sang SIM.
Paathag ni P/Lt Judesses Catalogo, tagpamaba sa NOCPPO, nga ini bangod ang ila mga numero ang masami ginagamit sa public service.
Madumduman nga kahapon na nag-umpisa ang SIM Registration Act kag ini ang epektibo sa sulod sa 180 ka adlaw ukon anom ka bulan.
Apang ginakasubo ni Catalogo nga kahapon, apisar sa attempt sini nga pagparehistro humalin alas-4:00 sang kaagahon tubtob na sa gab-i, wala gid ini makasulod.
Suno diri, kalabanan sa mga website sang leading telco providers ang down.
Paathag ni Catalogo nga bisan wala pa makapanaog sang mandato ang PNP Headquarters nga required ang tanan nga PNP personnel nga iparegister ang ila nga mga cellphone number, obligado ang mga ini bangod ini ang panibag-o nga layi.
Bilang tagapatuman sang layi, luyag sang NOCPPO nga sila ang una man nga makarehistro agud mapakita kag matudlo ang layi sa iban kasubong man ang iban pa nga mga provision sa layi.
Paathag sini nga ang layi ang ginahuman para sa benepisyo sang mga pumuluyo.
Suno diri, general perspective na nga ang PNP ang 100 porsyento nga magatuman sa layi.
Ginalantaw ni Catalogo nga nangin mabudlay ang pagparehistro sa una nga adlaw sang SIM Registration bangod sa kadamuon sang subscribers nga luyag magparehistro.
Nagpati ini nga bangod ginagamit ang mga cellphone sa importante nga mga butang gani kalabanan sa publiko ang indi luyag nga indi na magamit ang ila nga mga SIM card partikular na sa mga negosyante kag mga estudyante.
Ginapakamaayo naman sini nga madamo sang mga law abiding citizens nga nagasunod sa panibag-o nga requirement sang layi.
Ginalantaw sini nga wala lamang ma-antisipar sang telco provider ang bulk sang subscriber nga magaparehistro.
Ginalauman sini nga makabenepisyo sang dako sa law enforcement agency ang panibag-o nga layi.
Pinaagi sini ginalantaw nga mangin mahapos ang pagtrack kag pagtumod sa mga nagagamit sang cellphones sa iligal nga aktibidad.
Pahayag sini nga sa masami cellphone ang pamaagi sang mga modus operandi kag mode of communicition sang mga nagabuhat sang krimen.
Ginalauman ni Catalogo nga pinaagi sa layi, mas mapadasig pa ang imbestigasyon kag pagfile sang mga kaso agud gilayon nga mahatag ang hustisya sa mga biktima.
Kalakip naman diri ang mga iligal nga aktibidad gamit ang cellphone kaangay sang pagpangscam.
Suno pa kay Catalogo, bisan ang PNP ang may kabudlayan bangod masami sila makabatun sang mga sala nga impormasyon gani pinaagi sa layi mahimo nila matumod kun sin-o ang mga nagapadala sang false information sa otoridad.
