Wala sang kinalain ang private armed groups kag goons bangud pareho ang mga ini nga illegal kag wala ginapahanugutan sang layi, suno sa tagpamaba sang Police Regional Office 6.
Suno kay Police Lt. Col. Arnel Solis, magkapareho lamang ang nasambit nga grupo apisar nga lain ang term nga ginagamit bangod pareho lamang ang mga ini nga nagalapas sa layi.
Dako man nga posibilidad nga indi lisensyado nga armas ang mga ginagamit sang parehas nga grupo.
Nakadepende naman kun pinaagi sa search warrant ukon police operations ang patigayunon agud nga madakpan ang mga nagagamit sang loose fire-arms kaangay sang private armed groups kag goons.
Sa pihak nga bahin ginpahayag man ni Solis nga may yara sang mga kapulisan nga kabahin sang security personnel sang mga pulitiko sa Western Visayas nga ginalimitahan lamang sa duha.
Suno kay Solis may yara ang Philippine National Police nga requirements nga ginhatag sang Commission on elections (Comelec).
Suno kay Solis may mga politiko naman nga nag-apply agud makakuha sang security personnel kun sa diin may-ara sang naaprubahan kag may-ara man nga wala gin-aprubahan sang committee on the ban on firearms and security concerns sang Comelec.
Suno kay Solis ginahatag lamang ang approval sa mga kandidato kun nakita sang Comelec nga nagakinahanglan gid ang mga ini sang security personnel.
Nagpanawagan man ini sa mga politiko nga indi magsuporta sa mga private armed groups bangud ini ang ginadumilian kag ang mapamatud-an diri ang magapanabat sa layi.
