Ginpasiguro sang Police Regional Office 6 ang hugot nga pagbantay sa seguridad sang mga kandidato kag mga supporters kadungan sang local campaign period bwas, Marso 25.
Sa interview sang Bombo Radyo kay PRO 6 spokesperson Police Lt. Col. Arnel Solis, 46 dias nalang ang nabilin antes ang election day sa Mayo 9 kag nakahanda na ang mga pulis para diri.
Suno kay Solis, mahimo nga may pagbag-o pa sa security plan sang PRO 6, depende sa sitwasyon sa mga kabanwahanan kag kaciudaran samtang nagahilapit ang adlaw sang piniliay.
Sa subong suno kay Solis, wala pa man sang narecord nga election-related violence sa Western Visayas kag kun may ara man nga wala sang kaangtanan sa eleksyon, masarangan ini nga solbaron sang mga police units.
Indi pa man matumod kun pila ang augmentation nga ipadala sang PRO 6 bangud magadepende ini sa sitwasyon kag kadakuon sang lugar.
Suno kay Solis, mahimo ang kuhaon ang iban nga police officers sa idalom sang Bacolod City Police Office kag ideploy sa probinsya sang Negros Occidental bangud wala man diri sang narecord nga kinagamo.
