Suportado sang Police Regional Office 6 ang ginpahayag ni Presidente Rodrigo Duterte kagab-i nga ipatuman sini ang Alunan Doctrine.
Samtang nagahilapit ang eleksyon, ginpahayag ni Presidente Rodrigo Duterte nga iya igapatuman ang “Alunan doctrine” nga nagalimita sang numero sang armado nga gwardiya sang mga politiko sa pungsod nga posible makatuga sang political violence.
Suno kay Duterte, sa idalom sang nasambit nga polisa, duha lamang ka mga bodyguards ang sarang nga maangkon sang kada kandidato kag kun masobra sa duha, makabig na ini nga private army.
Suno sa presidente, dapat limitahan sang mga kandidato ang ila mga kaugalingon kag kun pamatyagan nila may yara sang pagpamahog batok sa ila, ipatawag sini ang regional director ukon chief of police kag istoryahon nga likawan lamang ang away ilabi na gamit ang armas.
Ang Alunan doctrine ang gin-introduce ni anay Interior Secretary Rafael Alunan III, nga nagserbe sa idalum sang administrasyon ni late Presidente Fidel Ramos.
Sa interview sang Bombo Radyo Bacolod kay PRO 6 spokesperson Police Lt Col. Arnel Solis, suportado sang Regional PNP ang pagpatuman sang Alunan Doctrine.
Sa Alunan Doctrine suno kay Solis, ginalimitahan ang mga pulitiko sa duha ka security personnel nga mahimo makuha sa Armed Forces of the Philippines (AFP), Philippine National Police (PNP) kag licensed security agencies.
Samtang malinong kag matawhay ang nagapadayon nga pagpatigayon sang kampanya sa Western Visayas.
Suno sa tagpamaba sang PRO-6 wala sila sang namonitor nga mga pulitiko sa rehiyon nga nagagamit sang private armed groups.
Nagpanugyan man ini sa tanan nga pulitiko nga indi na kinahanglan maggamit sang private armed groups bangud tinutuyo sang tanan nga makapatigayon sang malinong kag matawhay nga eleksyon sa Western Visayas.
Dugang pa nga panugyan ni Solis sa mga botante nga indi pag-ibaligya ang boto kag mangin maalam sa pagpili sang mga kandidato nga botohon.
