Naghatag sang pahanumdom ang Police Regional Office 6 sa mga dapat tandaan sa pagpamakal samtang nagahilapit ang yuletide season.
Sa interview sang Bombo Radyo Bacolod kay PRO 6 spokesperson Police Lt. Col. Arnel Solis, sa holiday season lauman na ang pagbisita sang mga pumuluyo sa pila ka mga lugar kalakip na sa mga malls kag merkado.
Apang pahanumdom sini nga dapat maghalong sa mga pickpocket kag iban pa nga sahi sang pagpangawat.
Aminado si Solis nga madutay pa lamang sa karun ang narecord nga kaso sang pickpockets, apang ini ang mahimo magsaka sa masunod nga mga sinemana.
Gani dapat nga may-ara sang precautionary measures sa pagpadulong sa mga matawo nga lugar.
Suno kay Solis, dapat likawan ukon ikontrolar ang pagsuksok sang mga jewelries nga mahimo maka-attract sang mga malain nga elemento samtang isecure man ang kagamitan partikular na ang kwarta.
Likawan man ang magpaggwa ukon mag-isip sang kwarta sa matawo nga lugar.
Dapat man nga ireport sa kapulisan kun may mamutikan nga makaduluda nga indibidwal.
Suno diri, masami nga rasun sang mga kawatan amo ang kapigaduhon, apang pahanumdom ni Solis nga ang pagpangawat ang indi makasolbar sa ila problema, sa baylo makahatag pa sang dugang nga problema.
Pahanumdom sini nga sa paghimo sang krimen kabaylo ang posibilidad nga madakpan kag mapriso nga dugang pa nga huol sa pamilya kag biktima.
