Nagmando ang Police Regional Office 6 sa Bacolod City Police Office (BCPO) kag Negros Occidental Police Provincial Office (NOCPPO) nga maidid nga imbestigaran ang kaso sang pagpatay kay Pearl Joy Galve.
Madumduman nga ang 15 anyos nga Grade 10 student ang namissing sang Hulyo 29 sa Barangay Sum-Ag, Bacolod City kag nasapwan ang nagakaagnas nga bangkay sa sulod sang kampo sa Hacienda San Roque, Brgy. Cubay, La Carlota City, Negros Occidenta.
Sa interview sang Bombo Radyo Bacolod kay PRO 6 Spokesperson Police Lt. Col. Arnel Solis, nagabuligay sa karun ang BCPO kag NOCPPO sa pagsolbar sang kaso sunod sa instruction ni PRO 6 Director Police Brig. Gen. Jack Wanky.
Paathag sini nga luyag gid nila nga mabal-an kun ano ang matuod nga natabo, kag sa tion nga matumod ang suspect, ini ang gilayon man nga mapasakaan sang kaso.
Pasalig ni Solis nga ginahimo sang mga kapulisan ang masarangan agud maseguro nga mahatagan sang hustisya ang kamatayon sang biktima.
Paathag sini nga wala naghatag sang deadline ang PRO 6 agud indi dalion ang imbestigasyon, sa baylo ini ang mapadalman sang maayo.
Nagapalab-ot man ini sang simpatya sa nalisdan nga pamilya samtang pangabay man ni Solis nga konsensyahon ang may kahimuan kag atubangon sini ang ginhimo.
Mensahe naman sini sa mga ginikanan ukon guardians nga imonitor ang mga kabataan samtang ang mga kabataan ang dapat man nga mag-update sa ila nga mga ginikanan.
