Nagpahanumdom ang Police Regional Office 6 sa mga tumuluo kag mga pumuluyo nga siguruhon ang safety sa tion nga magpadulong sa areas of convergence ukon ginatipunan sang madamo nga tawo subong nga nabilin nga inadlaw sang Semana Santa.
Suno kay PRO 6 spokesperson Police Lt. Col. Arnel Solis, may nakadeploy nga mga pulis sa areas of convergence kaangay sang simbahan, mall kag mga resorts ilabi na sa Sabado kag Domingo.
Aminado ini nga may mga tumuluo nga magatambong sa religious activities apang may iban naman nga magabakasyon bangud sa long weekend.
Suno diri, dapat maghalong gid ang mga pumuluyo ilabi na kun magbyahe kun sa diin siguruhon nga yara sa maayo nga kondisyon ang salakyan.
Mas makabulig man suno kay Solis kun kuhaon sang turista ang contact number sang police station sa lugar nga ila kadtuan agud mahapos ang pagpanawag sang bulig kun kinahanglanon.
Antes magbiya sa balay suno kay Solis, dapat siguruhon nga sirado ini ukon ibilin sa tupad-balay nga may yara sang laktan agud nga sila ang makabulig sa paglantaw.
Likawan man suno sa iya ang pagpost sang AT THE MOMENT ukon ATM agud indi mahibaluan sang lawless elements nga may ginkadtuan kag wala sang tawo sa ila balay.
