Ginpasalig sang regional director sang Police Regional Office 6 nga seguruhon nila nga fully equipped ang mga katapo sang Special Weapons And Tactics (SWAT) Team antes magpatigayon sang operasyon.
Ini ang kasunod sang pagkapatay ni Police Staff Sgt. Michael Malan, ang team leader sang SWAT, matapos nga ini ang maluthangan sa ginpagtigayon nga drug buybust operation sa Iloilo City sang Oktobre 29.
Ginpasalig sang PRO 6 Director nga ila seguruhon nga mapasakaan sang nagakaigo nga kaso ang suspetsado nga nakapatay sa biktima kasubong man ang mga kaupdanan sini.
Nahibaluan nga ginabanta P7 million ang balor sang suspected shabu nga narecover sa operasyon kun sa diin ang subject person amo si Glenn “Bongbong” Yturiaga.
Sa interview sang Bombo Radyo Bacolod kay PRO 6 Director Police Brig. Gen. Sidney Villaflor, nagapalab-ot ang mga ini sang pagpakig-unong sa nabilin nga pamilya sang pulis samtang promisa naman sini sa asawa sang biktima nga ila hatagan sang hustisya ang kamatayon sini.
Aminado si Villaflor nga kabahin na sa risgo sa trabaho sang kapulisan nga sa paggwa para magduty, kaangay naman nga yara ang pihak nga tiil sa lulubngan.
Agud malikawan ang kaangay nga insidente, pasalig sini nga ifully equipped niya ang mga SWAT personnel.
Plano sini nga magprocure sang tear gas cannister kag flash-bang grenades nga sarang makastun ukon disorient sa mga kaangay nga suspetsado.
Ini ang makahatag naman sang dako nga bentaha sa mga SWAT members santo sa ila police operations procedure.
