Natalana nga imbestigaran sang Police Regional Office-6 (PRO-6) Internal Affairs Service (IAS) kag sang National Police Commission ang sang damlag lang nga anti-illegal gambling raid sa banwa sang Ilog nga nagresulta sa kamatayon sang isa ka persona.
Suno kay Negros Occidental Police Provincial Office (NOCPPO) spokesperson, Police Capt. Judesses Catalogo, igapaidalom si Police Capt. Thurslie Castillo, hepe sang Ilog Municipal Police Station sa motu propio case investigation.
Suno kay Catalogo, ang imbestigasyon ang kabahin sang standard operating procedure apang ang imbestigasyon ang magatutok sa kun ano gid man ang natabo sa tion sang raid.
Madumduman nga apat ang pilason kalakip na ang hepe sang Ilog Municipal Police Station matapos ang raid nga ginpatigayon batok sa iligal nga pagpanahor sa Barangay Dancalan, Ilog, Negros Occidental.
Ginakaptan na ni Castillo ang tatlo ka mga suspetsado kag wala man ang mga ini sang resistance sang umpisa apang kadungan sang kinagamo, hinali nalang nga naghunos sang kutsilyo ang tatlo kag ginbululigan buno ang hepe.
Si Castillo ang nakaangkon sang pilas sa likod, kilid, siko kag tiil apang nahimo pa sini nga depensahan ang kaugalingon pinaagi sa paghunos sang iya service firearm.
Nahimo nga maigo sang hepe ang tatlo ka mga suspetsado kun sa diin sa karun ginamonitor pa ang medical bulletin sang duha samtang yara naman sa estable nga kondisyon ang isa pa.
Ginalantaw naman nga irelieve anay si Castillo samtang nagapadayon ang imbestigasyon kag natalana nga butangan sang officer-in-charge ang Ilog Municipal Police Station.
