Padayon ang kampanya sang kapulisan sa idalom sang Police Regional Office-Negros Island Region batok sa smuggling kag mga illegal nga aktibidad sa bug-os nga rehiyon.
Sa interview sang Bombo Radyo Bacolod kay Police Captain Dax Santillan, spokesperson sang Bacolod City Police Office (BCPO), ginpahayag niya nga indi lamang sa Bacolod kundi pati sa gwa sang ciudad ginapatigayon ang mga apprehension kag operasyon batok sa smuggling.
Suno diri, wala untat ang kampanya sang kapulisan partikular sa smuggled cigarettes kag iba pa nga ilegal nga produkto.
Ang ini nga operasyon ang kabahin sang mas ginpasanyog nga kampanya sang Philippine National Police (PNP) batok sa smuggling sa bug-os nga pungsod nga nagresulta sa dako nga kadalag-an humalin Enero 1 tubtob Abril 30, 2026.
Sa report, nagdangat sa 5,389 nga operasyon ang napatigayon sang PNP nga nagresulta sa pagkaaresto sang 1,976 ka mga indibidwal kag pagkumpiskar sang mga smuggled nga produkto kag cash nga nagabalor P6.27 billion.
Kabahin ang kampanya sa Focused Agenda sang PNP sa idalom sang Enhanced Managing Police Operations, agud pabaskugon ang border protection kag tapnaon ang economic sabotage.
Padayon man nga ginaagda sang kapulisan ang publiko nga gilayon magreport sang mga makaduluda nga aktibidad.
