Ginahulat nalang sang Police Regional Office-Negros Island Region ang resulta sang imbestigasyon angot sa gina-alegar nga recruitment related extortion kun sa diin imbulbado ang isa ka police personnel nga assigned sa PRO-NIR headquarters agud nga mapasakaan ini sang nagakaigo nga kaso.
Sa interview sang Bombo Radyo Bacolod kay Police Lt. Col. Joem Malong, spokesperson sang Police Regional Office-Negros Island Region, nakabaton sang sulat ang regional director sang PRO-NIR nagikan sa complainant nga naga-alegar nga ginkuhaan ini sang kwarta sang police personnel kabaylo sa pagsulod sini sa Philippine National Police.
Apang nakita sang complainant nga wala sang chansa bangud wala man sang koneksyon ang police kag nabatyagan sini nga siya ang ginapangilkilan lang sang kwarta.
Rason nga nagreport ini sa mga otoridad kag naapresyar man sang mga kapulisan ang reklamo agud nga mahimuan sang tikang bangud mahimo nga indi lang isa ang nabiktima.
Ang complainant ang nagpa-blotter sa Bacolod City Police Office.
Suno kay Malong, matapos nga mabaton ang sulat nagmando ang regional director nga magpatigayon sang imbestigasyon.
Ang police personnel nga ginareklamo ang yara sa Regional Personnel Holding and Accounting Unit (PHAU) sang PRO-NIR samtang nagapadayon ang ginapatigayon nga imbestigasyon.
Ang ginareklamo nga police personnel ang isa Police Non-Commissioned Officer kag isa ka babayi nga may ranggo nga Police Corporal samtang ang complainant ang isa ka lalaki nga residente sang Bacolod City.
Ginaengganyo sang mga otoridad ang iban pa nga nabiktima man nga mag-file man sang reklamo.
Ang police personnel ang mahimo makakas sa serbisyo kun ini ang mapamatud-an nga imbulbado sa recruitment related extortion.
Panugyan ni Malong sa tanan nga luyag nga magsulod sa Philippine National Police ang dapat mag-apply lamang sa PNP Recruitment and Selection Service (RSS).
Suno pa kay Malong, ang pagsulod sa serbisyo ang libre kag nakadepende sa ila nga abilidad kag wala nakadepende sa mga connection sang mga ini.
