BACOLOD CITY — Nagpaathag ang opisyal sang Police Regional Office 6 sa pag-ilis sa director sang Bacolod City Police Office bisan wala pa nagatunga-tunga ang MassKara Festival 2017.
Nahibaluan nga nangin epektibo kahapon ang relief order batok kay Police Senior Superintendent Jack Wanky kag nagpungko si Police Superintendent Rhoderick Minong bilang officer-in-charge sang BCPO.
Si Wanky ang nagpungko sa sulod sang siyam ka bulan sa BCPO kag sa karon siya ang magareport sa PRO 6, pending sang iya masunod nga assignment.
Si Minong naman ang pinuno sang Regional Public Safety Battalion sa ciudad sang Victorias nga dungan man niya nga serbehan samtang nagapungko sa BCPO.
Sa press conference nga ginpatigayon kahapon sang hapon, ginpahayag ni Police Senior Superintendent Jesus Cambay Jr., deputy regional director for operations sang PRO 6 nga gin-islan si Wanky kasunod sang asud-asud nga krimen nga nagluntad antes pa man ang MassKara Festival tubtub subong nga masobra isa na ka semana ang kahiwatan.
Suno sa iya, nakit-an nga kinahanglan sang bag-o nga city director pagkatapos sang maid-id nga evaluation sang PRO 6 sa nagakatabo sa ciudad.
Nagpasalamat si Wanky sa kahigayunan nga ginhatag sa iya nga makapamuno sa Bacolod City Police Office sa sulod sang siyam ka bulan, subong nga gin-relieve na siya sa pwesto.
Ginpahayag ni Wanky nga “challenging” ang iya eksperyensya bilang city director sa Bacolod apang nagpasalamat ini sa iya inagyan diri sa ciudad.
Suno diri, “come and go” lamang ang mga opisyal sang pulis bangud indi permanente ang ila pagtinir sa isa ka palangakuan apang aminado ini nga may mga eksperyensya siya sa Bacolod nga sarang gid niya magamit sa palaabuton nga mga assignment.
Indi man tumandok sang ciudad sang Bacolod ukon probinsya sang Negros Occidental apang may eksperyensya na diri ang bag-o nga pinuno sang BCPO.
Suno kay Police Superintendent Rhoderick Minong, nagserbe siya bilang pinuno sang Special Action Force sa probinsya sang tuig 1995 tubtub 1996 kag nakaupod sini si retired Police Senior Superintendent Celestino Guara sa ciudad sang San Carlos.
Nahibaluan nga si Guara ang nagatrabaho na sa karon sa city government.
Si Minong ang graduate sang Philippine National Police Academy class of 1993.
