Nagpanindugan ang city director sang Bacolod City Police Office nga safe sa gihapon ang syudad sang Bacolod sa pihak sang mga insidente nga nagakasapwan nga mga utod nga kamot kag tiil kun sa diin masami nga may ginaupod nga mga sulat nga nagahatag sang paandam.
Sa interview sang Bombo Radyo Bacolod kay Police Col. Thomas Joseph Martir, temporaryo nga ginsaylo sa Bacolod City Police Office si Police Staff Sergeant Anthony Vistar kag wala anay ginpaduty kasunod sang insidente.
Suno kay Martir, naistorya na sini ang station commander sang Police Station 5 kun sa diin nadestino si Vistar, sang nakaligad may yara sang ginpatigayon nga SDET kun sa diin kabahin ang police personnel kag may yara man sila sang nadakpan apang ini ang paga-imbestigaran pa.
Ginpasiguro man sang city director nga safe sa gihapon ang syudad sang Bacolod sa pihak sang mga nagakasapwan nga parte sang lawas sang tawo nga ginabilin sa bahin sang syudad.
Suno diri, ang nagakatabo ang mahimo nagapabutyag nga may mga nagakaiguan na sa mga anti-drugs operation nga ginapatigayon sang mga kapulisan sa syudad.
Pila sa mga ginalantaw amo ang operasyon nga ginpatigayon sa Barangay 12 kag Barangay Banago kun sa diin mahimo nga may akig kay Vistar sa ila nga nadakpan kun sa diin gina-imbestigaran man sa karun.
Ginpahayag man ni Martir nga bisan sang indi pa man siya ang city director sang Bacolod City Police Office, nagakatabo naman ang kaangay nga insidente nga maka-distract ukon makatublag sa kapulisan sa syudad.
Si Martir ang magapaidalom na sa non-duty status sa PRO-6 bangud natalana naman nga mag-retiro sa bulan sang Mayo.
Samtang, bwas natalana ang turn-over of command sa Bacolod City Police Office sa tunga nanday Police Col. Thomas Joseph Martir kag Police Colonel Noel Calderon Aliño.
Si Aliño ang anay director sang Iloilo Police Provincial Office (IPPO).
Ang pag-designar kay Aliño ang base sa General Order Number PRO6-GD-DES-2023-2300 nga ginpaguwa subong nga adlaw, Abril 17, 2023, nga pirmado ni PCol Winston de Belen, ang head sang Regional Personnel and Records Management Division, kag sandig sa mandu ni Police Regional Office 6 Director Police Brigadier General Leo Francisco.
